PHATNA LEH BIEHPIEHNA (Praise & Worship)

PHATNA LEH BIEHPIEHNA (Praise & Worship)

Pasien PHATNA ichi chiengin Pasien tung a ilungkim seng jieh a I patoina ahi. I tung a ahoina leh a sillamdang bawltampi te jieh a Iphat uh ahi. Koipou phat kiut chiet a; inu leh ipa leh itung a silhoi hing bolsahte jong iphat chieng in lungdam dieh uh hi. Tuachi mabangin Pasien jong iphat chieng in I tungah lungdam hi. Sildang teng teng sang in I Pasein pen ‘phattah Pasien’ hideu se hi (Sam 18:3). Bible sung a thupieh ‘Mangpa phat un’ chi mun tampi aki mu hi. Van angelte leh vanmite’n Manpa phat un chi thupieh ahi (Sam 89:5, 103:20, 148:2, 13). Leitung leh asung um jousieh in Ama phat uh (Sam 138:4, Rome 15:11). Phatna pen biehpiehna chikhat ahi.

BIEHNA pen Pasien a liulieu ahi (Luka 4:8), eima hinna kipiehkhie a, I sunglam apan a kuon a kipiehkhietna khu biehpiehna ahi. Na lungtang tengteng un, na Hagau teng un hing bieh un chi ahi. Tami pen ngetthoh ahisih a, thupieh; gingtu khat in abol teitei die thupieh ahi. Dihtah a ibieh theina ding in Ama mai a kiniemkhiet a ipumpi ipiehkhietna leh Ama control na nuoi a um angai hi. Jesu’n hichin gen hi, ‘Pasien in Hagau leh Thutah a biehte asui hi ( Johan 4:23). Hing pei un I Mangpa khu khupdin in be vai chi ahi. Tami kiniemkhietna in Hagau Siegthou aw hing jasah a, hing kiphohdoh sah a, hing hamuan jel hi.

Tuajiehin BIEHNPIEHNA LEH PHATNA  in sil thupi bawlthei hi.  Praise & Woriship (Phatna leh Biehpiehna) akijohkhom chieng a siltungte tamlou en vai:

Ø  I Mangpa phatna lasa pou lei aman igalte hing dousah jel hi. Guoljohna ei a ahi.

 

2 Khangthute 20:20-22:  Leng Jehoshaphat ading doh a; “Juda leh Jerusalem mite aw hing ngaikhie un, Mangpa na Pasian uh muong un, tuachi’n na dingdet ding ua, aguolneite gingta un, tuachi’n na lawching ding uhi,” achi hi. Mipite toh akithumu zouin Jehoshaphat in, galkap honte masanga peikawm a Mangpa sienthouna thupi mama zieh a, amai a lasa ding leh ama phat ding mite aguot a, “Mangpa phat un a itna kumtawn a um ding ahi ziehin,” achi hi. Tuachia Mangpa aphat jing lai un Mangpa’n Juda gam dou dinga hingkuon Ammonte Moabte leh Seir muol a tengte, aguh a buh a dou ding akoi a, amaute zaw in a umta uhi. Tualeh Juda mite gamdai kimu suhna galvenna innsang lam zuon a ahing peilai un, tua galkap hon tampite agal et ua, ngai vawi, lei lah a mishi luong lum phengphung ngen a mu uhi. Asuohta mawngmawng aum sih uhi. AMEN!

 

Ø  Mangpa phatna la isah chieng in melmapa Hagau gillou te potdoh in kihem mang jel in;

 

1 Samuel 16:14-23: Mangpa Hagau in Saul a pawtsanta a, tualeh Mangpa sawl hagau gilou khat in Saul asubuoita hi’. ………….. 18. “En in, Bethlehem mi Jesse tapa khat ka mu a, amapa khu tumging tumsiem, mihangsan, galdou siem, thugen siem tualeh mel hoitah ahia; akung ah zong Mangpa a um hi,” achi hi… 23. Tualeh hichi ahing ahia, Pasian akipat a hagau gilou khu Saul tunga aum chiengin David in tumging ala a atum zel hi, tuachi’n Saul ahing dam zel a, tuachi’n hagau gilou in Saul apawtsan zel hi.

 

Ø  Mangpa phatna la sajing te Mangpan bolkhielte liekhu in atung a lungdam hi;

 

Nasepte 13:22 ‘……Pasian in, Jesse tapa David ka lungtang bang puo mi ka mudohta, aman ka deilam abawl ding, achi hi’. David pen abawlkhiel thei mihing hi veve a, A sepai galkap Uriah zi Bethsibah adeigo in kitenpi hi, thamlouin Uriah pen athatsah nalai hi. Hinanleh, Mangpan ka lungtang bang puo achi thouthou nalai hi. Ajieh Sam laibu sung Pasien phatna late, atamjoh David phuoh ngen ahia, Pasien aphat phatmi ahi jieh in Pasien atungah alungkim mama a, abolkhiel nate, nasieh jieng jong leh chiemte vetlou dan ahi.

Ø  Mangpa phatna lasah a lamjing te kipahjing uh a, etnuom jong etnuom hi.

 

Kihilna 19 sung ah Vangam a Belamnou mouneipa phatna ding thu kimu hi. Gingtute Vankhopi I tun chieng a tatsateng leh van angelte toh top leh gim chi umlou in Belamnou I phat tontung ding ahi chi ithei uhi. Tujiehin eite jong tuami ni chieng a iphat tontung theinang a tunia iki singsah na uh ahi. Phatjou sem leh lamjou sem ding Mangpan ibawn in hing guoljolta hen. Evan. Chingngailun in Pasien phat in dieng dieng leng yoga chite ngai selou hi, I figure hoilel a, exercise hoitah jong ahi chi hi. Gingtute New yoga pen ‘Pasien phatna’ himai dan hi.

 

Hunkhat lai in keima ngel in, miten Mangpa phatna lasa a akikou ua, akhutte uh a lapsang chieng un kana thanuompi sih a, khatvei vei mothuoi bang kana sathei jel hi.  Mipite phatna lasa a ahing dieng ua ahing lam chieng un jong thanop pi lou in kana toujel thei hi. Ahin, Mangpan ‘Keima phatna khutjah utlou na hileh jah non da mai tan’ chi hileh kilom in lupna tung ahing ngahsah a, ka khut ka neppha den na domthei nonlou in hunsotpi ka um hi. Hospital te a pei in damdoi (aneh, anu ding toh) khut exercise lah ding dan ahing hil ua, a dam sieng na ding in kumkhat lut ding ahi. Hinanleh, ka vangpha a, Pasien kammal kana jah a, hatlou pumpum in jingkal nitah in khutte lamsang tou in Manpa ka patoi a, hathum sung in ahing normal kie ta hi. Tuami ni apan tuni dong Mangpa phatna a khute lamtou a tangkou kachimtah non sih hi. Praise the Lord.

Katha hatna pi in, Mangpa phatna late sa (Praise & Worship) minute 20-30 bang akinei chieng in kaning akitel mama a, kana kitousuh jel hi. Kengtha hatlou, adingjouloute toh dinmun kibang in kana kidihtan mama hi. Ahin, Mangpa kei hing phat a ding joulou nahi leh chin damlou in kum 5 lam lupna tung ahing ngahsah a, Biehinn kai chitahlou Kristmas leh special day tuomtuom te Innmun a lupna tung a ka ngen a kum 4 val bang kahing mang vang hasa mama hi. Luanhi in mit tuom mang in Mangpa hing ngaidam in chia kaka lou bolthei umlou ahi.

Tuni, nang in jong tua katuoh teng tuoh thein ahi chi ki manghil sih, ka galpa tuoh ding ajong ka phallou te ahi. Tuajiehin Christ a ka Unau Nu leh Pa leh Nungah Tangval te Mangpa phatna in itha ijung it sih va ui. Tukhu ahun ahi.  

[ Vanggam a tom chi umlou, chim chi umlou in Belamnou hoi na phat in vanmiten a zaiawi ta ding uhi. Tuajien a vangam tung ding vet vet ihileh pen tunia pan a Phatna lasah, khutjah a lasah kijil ngaita hi, Vangam a ken phatna la sasiemlou, lamtheilou chi excuse um nonlou maithei ahi. Ahun lah anaita ngal a]